Telugu News

కరోనా భయం.. డబ్బులను వేడిచేయబోతే బూడిద మిగిలింది! నోట్లతో వైరస్ వస్తుందా?

కరోనా వైరస్ ప్రపంచాన్ని ఎంతగా కలవర పెడుతుందో తెలిసిందే. చివరికి భారతీయులను సైతం భయాందోళనలకు గురిచేస్తున్న ఈ వైరస్ వల్ల ప్రజలు బిక్కుబిక్కుమని కాలం వెళ్లదీస్తున్నారు. వైరస్ తమ వరకు రాకుండా ఉండేందుకు జాగ్రత్త పడుతున్నారు. మాస్కులు, గ్లవ్స్ కోసం మెడికల్ షాపుల ముందు క్యూకడుతున్నారు. ఈ నేపథ్యంలో ఏయే వస్తువుల ద్వారా కరోనా వైరస్ వ్యాపిస్తుందనే విషయాలపై ప్రత్యేకంగా దృష్టిపెడుతున్నారు.

డబ్బులను మెక్రోవేవ్ ఓవెన్‌లో పెట్టి.. వేడిచేసిన మహిళ

కరోనా వైరస్ నేపథ్యంలో ఇండియాలోనే పరిస్థితి ఈ స్థితిలో ఉందంటే.. ఇక చైనాలో ఏ స్థాయిలో ఉందో అర్థం చేసుకోవచ్చు. ఈ సందర్భంగా అక్కడి ప్రజలు కరెన్సీ నోట్ల ద్వారా కూడా కరోనా వైరస్ వ్యాపించవచ్చని భయపడుతున్నారు. దీంతో జియాంగ్యిన్ నగరానికి చెందిన అంట్ లీ అనే మహిళ బ్యాంకు నుంచి డ్రా చేసిన డబ్బులపై వైరస్ ఉండవచ్చని భావించింది. వేడి చేస్తే వైరస్ చచ్చిపోతుందనే ఉద్దేశంతో రూ.31 వేలను మైక్రో‌వేవ్ ఓవెన్‌లో పెట్టి వేడి చేసింది. దీంతో ఆ డబ్బులు బాగా వేడెక్కి కాలిపోయాయి. ఏదో వాసన వస్తుందని చూస్తే.. మైక్రోవేవ్ ఓవెన్ నుంచి పొగలు రావడం కనిపించింది.

ఎక్స్‌ఛేంజ్ కోసం పరుగులు..

ఆమె మైక్రో వేవ్ ఓవెన్‌లో పెట్టిన నోట్లలో చాలావరకు కాలిపోయాయి. కొన్ని మాత్రం ముట్టుకుంటే చిరిగిపోయేంత పెలుసుగా మారాయి. దీంతో ఆమె ఆ డబ్బులను పట్టుకుని వివిధ బ్యాంకులకు వెళ్లింది. ఎక్కడికి వెళ్లినా.. ఆమెకు ప్రతికూల సమాధానమే ఎదురైంది. అగ్నిప్రమాదం జరిగినట్లు ఆధారాలు చూపిస్తే ఆ నగదును మార్చి కొత్త నోట్లు ఇస్తామని బ్యాంకు అధికారులు చెప్పారు. చివరికి.. ఓ బ్యాంకు ఆమె బాధను అర్థం చేసుకుని కాలిన నోట్లను తీసుకొనేందుకు అంగీకరించింది.

చైనా ముందు చూపు.. వైరస్ సోకకుండా ఏం చేసిందంటే..

కరెన్సీ నోట్ల ద్వారా వైరస్ సోకుతుందని ముందే భావించిన చైనా యంత్రంగా బ్యాంకుల్లో ఉన్న వాడేసిన నోట్లన్నింటినీ క్రిమి సంహారకాలతో శుభ్రం చేసింది. అల్ట్రావయోలెట్ లైట్, అత్యధిక ఉష్ణోగ్రతల్లో బ్యాంక్ నోట్లను ఉంచి వైరస్‌ను చంపేసింది. అనంతరం 14 రోజులపాటు ఆ నోట్లను సీల్ చేసింది. ఎక్కడైదే ఆర్థిక సమస్యలు ఉన్నాయో ఆ ప్రాంతాలకు వాటిని సరఫరా చేస్తూ జాగ్రత్తపడింది. పాత నోట్ల చెలామణిని కూడా నిలపేసింది. డిజిటల్ లావాదేవీలను ప్రోత్సాహిస్తోంది. ప్రపంచ ఆరోగ్య సంస్థ సూచనల ప్రకారం.. వైరస్ కలుషిత వస్తువుల ద్వారా ఒకరి నుంచి మరొకరికి సోకే ప్రమాదం ఉంది. ఒక ఏమైనా వస్తువులను తాకినట్లయితే ముఖం, కళ్లను ముట్టుకోకుండా చేతులను సబ్బు లేదా శానిటైజర్లతో శుభ్రం చేసుకోవాలని సూచించింది. కాబట్టి, మీరు కూడా ఈ విషయంలో జాగ్రత్తగా ఉండండి.

Source: https://telugu.samayam.com/

Tags

Related Articles

Leave a Reply

Your email address will not be published.

Close