అక్కడి ఇస్రో ప్రాంగణంలో రూ.24.2 లక్షలతో నిర్మించే కృత్రిమ చంద్రుని బిలం పనులు సెప్టెంబరు మొదటి వారంలో పూర్తవుతాయని ఇస్రో అధికారులు వెల్లడించారు. పది మీటర్ల వ్యాసం, మూడు మీటర్ల లోతులో నిర్మించనున్న ఈ బిలం ల్యాండర్‌లోని సెన్సార్ల పరితీరును పరిశీలించే పరీక్ష(ఎల్‌ఎస్‌పీటీ)గా ఇస్రో పేర్కొంది. కృత్రిమ చంద్ర బిలం ద్వారా రాకెట్‌లో సెన్సార్లు, ల్యాండర్‌కు మార్గనిర్దేశం చేయడంలో ఎంత సమర్థవంతంగా ఉన్నాయో దీని ద్వారా తెలుసుకోవచ్చని తెలిపింది.
చంద్రయాన్-2 తరవాత చేపట్టే చంద్రయాన్-3 ప్రయోగం కూడా పూర్తిస్థాయి స్వదేశీ పరిజ్ఞానంతో సిద్ధమవుతోంది. ఈ సారి ల్యాండర్ గమన వేగాన్ని నిర్ధారించే బహుముఖ ప్రయోజనకర సెన్సార్లను వినియోగించనున్నట్లు అధికారులు తెలిపారు. ఈ కృత్రిమ ఉపరితలంపై కనీసం మూడుసార్లు సామర్థ్య పరీక్షలు జరిపిన తరవాతే చంద్రయాన్-3ని ప్రయోగిస్తామని వివరించారు.
చంద్రయాన్-2 మాదిరిగానే తదుపరి మిషన్ కూడా స్వయంప్రతిపత్తి కలిగి ఉంటుంది. ల్యాండింగ్ ప్రదేశం నుంచి ల్యాండర్ ఎత్తును అంచనా వేయడం, వేగాన్ని నిర్ణయించడానికి, బండరాళ్లు, అస్తవ్యస్త ఉపరితలం నుంచి క్రాఫ్ట్‌ను దూరంగా ఉంచడానికి సహాయపడేలా బహుళ సెన్సార్లను వినియోగించనున్నారు. ఈ పరీక్షలో సెన్సార్లతో ఎగురుతున్న ఇస్రో రాకెట్ కృత్రిమ చంద్ర ఉపరితలంపై 7 కిలోమీటర్ల ఎత్తు నుంచి దిగుతుంది. సుమారు 2 కిలోమీటర్ల ఎత్తు నుంచి ఈ సెన్సార్లు మార్గనిర్దేశం చేసే సామర్థ్యాన్ని ప్రదర్శిస్తాయని భావిస్తున్నారు.
Source link
