Blog

గతంలో ఎన్నడూ చూడని సూర్యుడి అరుదైన ఫోటోలు.. సౌరవ్యవస్థ అధ్యయనంలో కీలక ముందడుగు


సూర్యుడి పుట్టుపూర్వోత్తరాల గురించి మరింత లోతుగా తెలుసుకోడానికి శాస్త్రవేత్తలు చేస్తున్న ప్రయత్నాలకు కొత్త ఆధారాలు లభించాయి. సూర్యుడికి సంబంధించిన అత్యంత అరుదైన ఫొటోలను ప్రపంచంలోనే అత్యంత పెద్దదైన సోలార్‌ టెలిస్కోప్‌ డానియల్‌ కే ఇన్యూయే సోలార్‌ టెలిస్కోప్‌ (డీకేఐఎస్‌టీ) తీసింది. అద్భుతమైన ఈ ఫోటోలను అమెరికా ఖగోళ శాస్త్రవేత్తలు విడుదల చేశారు. సూర్యుడి ఉపరితలానికి సంబంధించిన అరుదైన ఫొటోలను హవాయి ద్వీపంలో ఏర్పాటు చేసిన ఈ భారీ టెలిస్కోప్ చిత్రీకరించింది. వీటి సాయంతో సూర్యుడిని అత్యంత సమీపంగా చూస్తూ.. అంతర్గత శక్తిని అంచనా వేసే అవకాశం ఉంటుందని ఖగోళ పరిశోధకులు ఆశాభావం వ్యక్తం చేస్తున్నారు.

టెలిస్కోప్ విడుదల చేసిన ఫొటోల ఆధారంగా.. సూర్యడి ఉపరితలం మీది కణాల లాంటి ఆకారాలను జూమ్‌ చేయగా.. ఒక్కోటి అమెరికాలోని టెక్సాస్‌ రాష్ట్రం పరిమాణంలో ఉందని తెలిపారు. ఈ ఫోటోలను విశ్లేషించడం ద్వారా సూర్యుడి నుంచి వచ్చే శక్తిమంతమైన కాంతి కిరణాలు, జ్వాలల ఉత్పన్నానికి కారణాల్ని తెలుసుకోవచ్చని అంచనా వేస్తున్నారు. తద్వారా సదరు జ్వాలల కారణంగా ఉపగ్రహాలు, పవర్‌గ్రిడ్లు ధ్వంసం కాకుండా సత్వరమే హెచ్చరికలు జారీ చేసేందుకు ఉపయోగపడుతుందని తెలియజేశారు.

కాగా సూర్యుడి ఉపరితలం గురించి పలు రహస్యాలను తెలుసుకోవడానికి డీకేఐఎస్‌టీని రూపొందించారు. సూర్యుడి ఉపరితలం కంటే కరోనా ఎందుకు లక్షలాది రెట్లు వేడిగా ఉంటుంది.. అంతరిక్షంలో వేడి గాలులకు కారణమేంటి, తదితర అంశాల గురించి అంచనా వేయడానికి ఉపయోగపడుతుంది.

సూర్యుడి ఉపరితలంపై సంభవించిన సౌర విస్ఫోటనాలు భూమిపై తీవ్ర ప్రభావం చూపుతాయి. ఇవి విమాన ప్రయాణానికి అంతరాయం, బ్లాక్‌ఔట్లకు కారణమవుతాయి. అలాగే నావిగేషన్ కోసం ఉపయోగించే జీపీఎస్ లాంటి సాంకేతికతను కూడా నిలిపివేస్తుంది. గెలీలియో కాలం నుంచి సూర్యుడిపై అధ్యయనానికి మానవాళి చేస్తున్న ప్రయత్నాల్లో ఇదో గొప్ప ముందడుగని హవాయిలోని మనోయ్ ఇన్‌స్టిట్యూట్ ఆఫ్ ఆస్ట్రానమీ ప్రొఫెసర్ జెఫ్ కుహ్ వ్యాఖ్యానించారు.

అత్యాధునిక పరికరాలు అందుబాటులోకి రావడంతో భవిష్యత్తులో ఈ భారీ టెలిస్కోప్ మరింత శక్తివంతంగా ఉంటుంది. ఐఎఫ్ఏ‌కు చెందిన శాస్త్రవేత్తల బృందం రెండు సంక్లిష్టమైన పరారుణ పరికరాలను నిర్మించింది. ఇది సూర్యుని అయస్కాంత కార్యకలాపాలు, సౌర తుఫానులను అంచనా వేయడానికి వీలు కల్పిస్తుంది.

ఇందులో మొదటి దానిని క్రయోజెనిక్ నియర్-ఇన్ఫ్రారెడ్ స్పెక్ట్రోపోలారిమీటర్ అంటారు. దాదాపు రెండు టన్నుల బరువుండే సౌర డిస్క్‌కు మించిన సూర్యుని అయస్కాంతత్వాన్ని కొలవడానికి ఉపయోగపడుతుంది. రెండోది డిఫ్రాక్షన్-లిమిటెడ్ నియర్-ఐఆర్ స్పెక్ట్రోపోలారిమీటర్ అని పిలుస్తారు. దీని సాయంతో సూర్యుడి అయస్కాంత క్షేత్రాల పరిణామాన్ని వివరంగా తెలుసుకోవచ్చు. అయితే, వీటిని అత్యంత సున్నితమైన సాంకేతికతను ఉపయోగించి, సూర్యుడి గురించి క్లిష్టమైన అంశాలను గుర్తించామని ప్రొఫెసర్ వెల్లడించారు.


Source link

Related Articles

Leave a Reply

Your email address will not be published.

Close